جوزى حرمنى من الورث لصافى هانى

حبيبتي.
مسكت المصحف وضمتّه لصدري وبكيت بكاء عمري ما بكيته قبل كده.. بكاء فرحة وبكاء ندم إني شكيت فيه ولو للحظة.. وعرفت وقتها إن جوزي سابلي الدنيا بحالها، وخرجني من الدنيا دي مستورة ومرفوعة الراس.
قعدت على الأرض وسط الكراتين والدموع نازلة مش راضية تقف، بس المرة دي دموع
راحة وندم إني ظنيت فيه سوء ولو للحظة واحدة. بصيت للمصحف اللي في إيدي وبستُه وحطيتُه على راسي، وحسيت فجأة إن البيت اللي كان فاضي وموحش بقا مليان بدعواته وروحه اللي لسه بتحميني.
لميت الورق والمفاتيح والمصحف في شنطتي، ووقفت على رجلي وأنا حاسة بكرامتي وعزتي اللي رجعوا لي في ثانية. مابقتش خايفة من بكرة، ولا شايلة هم كلام الناس وقرايبه اللي كانوا بيبصوا لي بشماتة في العزا وكأنهم كسبوا المعركة.
نزلت من الشقة وسبت لهم الجدران والكراتين يشبعوا بيها. أخدت تاكسي وطلعت على العنوان اللي في العقد.. فيلا التجمع. أول ما وصلت وفتحت الباب بالمفتاح الجديد، لقيت جنينة صغيرة وهدوء يرد الروح، والبيت جاهز على السكن ومش ناقصه الهوا.
دخلت صليت ركعتين شكر لله، ودعيت لإبراهيم من كل قلبي إن ربنا يجعله في ميزان حسناته ويجازيه
عني خير الجزاء. عرفت وقتها إن العشرة والأصل مابيهونوش على ابن الأصول، وإن إبراهيم ما سبنيش للدنيا تلطش فيا، بالعكس.. ده خرجني من المولد كسبانة ستر وصحة وراحة بال، وسبقني على دار الحق وهو مأمن غيبتي ومقفل ورايا كل أبواب الحوجة.
مرت الأيام، وبدأت أستقر في بيتي الجديد. كل ركن في الفيلا كان بيحسسني بالأمان اللي إبراهيم خطط له عشان يعوضني بيه عن الصدمة الأولى. قرايبه وأصحابه اللي كانوا فاكرين إنهم ورثوا ورث قارون، بدأت مشاكل الشركات والقروض تظهر ليهم، ولقوا نفسهم غرقانين في قضايا ومحاكم مابتخلصش، وعرفوا وقتها إن إبراهيم الله يرحمه كان باصص لبعيد، وشايلني من الحسبة دي كلها حماية ليا ومش عقاب.
في يوم الجمعة، لبست عبايتي ونزلت رحت الجامع الكبير اللي إبراهيم بناه ووهبه لله. قعدت في مصلى الحريم، وطلعت المصحف
الصغير بتاع والدته اللي كان في الصندوق، وبدأت أقرأ منه قرآن وأوهب ثواب القراءة لروحه.
وأنا خارجة من الجامع، لقيت راجل عجوز من المسؤولين عن دار الأيتام التابعة للجامع، أول ما شافني جه وسلم عليا باحترام كبير وقال لي أهلاً يا ست هانم.. الحاج إبراهيم الله يرحمه كان دايماً يوصينا ويقول الخير اللي بيتعمل في الدار دي كله قايم على حس ورضا الست عائشة، وهي بركتنا اللي بندعي لها في كل صلاة.
ساعتها الدموع نزلت من عيني تاني، بس المرة دي كانت دموع فخر وعزة. عرفت إن إبراهيم ما سابليش مجرد فيلا وفلوس في البنك.. ده سابلي سيرة طيبة، ودعوات من ناس مأعرفهاش بتوصلي بسببه، وحياة هادية ومستورة أعيش فيها اللي باقيلى من عمري وأنا رافعة راسي، وبدعي له في كل سجدة إن ربنا يجمعني بيه في الجنة زي ما جمعنا في الدنيا على الحب
والأصل.